Mohabbat ki khatir jung ladne waalon
Ye jazba kahan se laate ho?
Apnon se bhi aur gairon se bhi
Bagaawat kar jaate ho!
Kahan se aati hai itni taaqat
Ki apne jazbaaton ki khaatir tum
Mar mitne ko ho tainaat ?
Itna aitbaar hai apne pyaar par?
Itna gumaan hai apne jazbaaton par?
Kya socha tumne kabhi apni chaahat ka kaaran?
Ya kood pade bas, sun ke dil ki dhadkan?
Machle man ki tum baat maan gaye?
Itni aasani se kisi ko dil de gaye?
Kya itna vishwaas hai khud par?
Ki duniya jahaan ko chhodkar
Wo tumpe marne lage..
Wo tumhe chahne lage?
Itna khaas samajhte ho khud ko
Ki poori zindagi wo sirf tumse pyaar kare?
Agar sach mein tum aise ho
To naaz hai mujhe tum par
Eershya bhi karti hoon tumse
Nafrat bhi karti hoon beshumaar…
Aise ho tum, to koi tumsa nahi
Aise ho tum, to badalna nahi !!!
❤
Desire To Express 